Një përplasje e fortë është shkaktuar sot në Kuvendin e Kosovës, ndërsa diskutohej për ndërprerjen e kontratave për infermierët. Ndërprerja e kontratave të stafit mjekësor që ishin angazhuar gjatë pandemisë COVID-19, ka nxitur replika të ashpra mes ministrit të Shëndetësisë, Arben Vitia dhe ish ministrit të këtij dikasteri, Armend Zemaj.
Vitia ka deklaruar se kontratat për infermierët ishin lidhur kur ka pasur nevojë nëpër institucione shëndetësore, dhe se janë mashtruar nëse do të kishin vijimësi. Stafit mjekësor që tashmë iu ka përfunduar kontrata, kanë protestuar disa herë në shenjë pakënaqësie.
“Infermierët kanë lidhur kontratë kur ka pasur nevojë nëpër institucione shëndetësore. Kanë qenë kontrata me afat të caktuar, nëse ish ministri ju ka premtuar se mund të iu vazhdohet, atëherë ata janë mashtruar. Kemi respektin maksimal për këta infermierë, por ky është realiteti”, deklaroi ai.
Një kundërpërgjigje ka ardhur nga ana e ish ministrit Armend Zemajt, ku tha se është për të ardhur keq, dhe se nuk e ka mashtruar askënd.
“Ministri i Shëndetësisë më vjen keq për fjalorin tuaj mashtrues, mashtrues ordiner. Angazhimi i stafit mjekësor është bërë në bazë të ligjit për parandalimin dhe luftimin e COVID-19, ky angazhim nënkupton për nevoja urgjente.
Nëse ky ministër gjeni, deklaron ligjërisht që pandemia ka përfunduar në Republikën e Kosovës, atëherë nuk do të ketë nevojë për angazhim tutje, të këtij stafi”.
“E dyta, ministër ne nuk e kemi mashtruar askënd, ashtu siç po bëni ju. Ata nuk janë analfabetë funksional, janë të gjithë me shkollim adekuat, dhe e din se çfarë kanë nënshkruar dhe afatin e kontratës”.
