Ditën e djeshme e gjithë bota u trondit nga masakra në Las Vegas, ku një breshëri automatiku u lëshua në gjatë një koncerti, ku ishin mbledhur rreth 22 mijë persona.
Sulmi shkaktoi 59 viktima dhe mbi 500 të plagosur dhe po cilësohet si vrasja më e madhe në historinë e SHBA-ve.
Por, ajo që ka ndodhur një ditë pas sulmit me bilanc tragjik është vërtet për t’u marrë shembull. Qindra persona janë mbledhur dhe po presin në radhë për të dhuruar gjak, në mënyrë që të ndihmojnë të lënduarit e këtij sulmi.
“Nuk dija çfarë të bëja tjetër. Nuk mund të rrija ulur në shtëpi, prandaj mendova se duhet të jem këtu”, tha një nga vajzat që pret në radhë për të dhuruar gjak teksa shpërthen në lot nga ngjarja e rëndë.
Disa njerëz filluan të mblidheshin pranë qendrave të dhurimit të gjakut që në 02:00 të mëngjesit, vetëm pak orë pasi ndodhi sulmi.
“Erdha për të treguar mbështetja dhe një shenjë qëndrese!”, thotë një tjetër person.
Ekspertët shprehen se dhurimi i gjakut është mjaft i rëndësishëm sepse godijet nga breshëritë e automatikut mund të shkaktojnë disa dëmtime të ndryshme.
“Ato mund të shkatërrojnë zorrët, mund të çajnë mushkërinë, mund të shkaktojnë fraktura, gjakderdhje në legen etj. Gjaku është baza e jetës dhe ne kemi nevojë për të, vërtet që mund të shpëtohen jetë”, tha mjeku Robert Glatter.
Gjithsesi, gjaku i dhuruar nuk mund të përdoret menjëherë, pasi është e nevojshme që t’u nënshtrohet analizave fillimisht.
Në rrjetet sociale, por edhe nga policia ka pasur thirrje të shumta për të dhuruar gjak, ndërsa solidarizimi i njerëzve ka qenë mjaft i madh./ Përshtati: Tirana Today
