Pas masakrës me një të vrarë dhe pesë të plagosur në 4 korrik, ngjarje e cila ndodhi pranë Teqesë së Kavajës, gjykata ka lënë në burg pesë të arrestuarit.
“Arrest me burg” u vendos për shtetasit Marjus Aliu, 31 vjeç, Ardian Dedej, 43 vjeç, Eraldo Hyka, 22 vjeç, Qazim Merkja, 25 vjeç, të akuzuar për vrasje. Në burg u la dhe Agron Kollçaku, 39 vjeç, i cili nuk kallëzoi për krimin. Në kërkim është Denis Aliu, 33 vjeç.
Nga hetimet e kryera në lidhje me këtë ngjarje të rëndë ka dalë që Eraldo Hyka, Ardian Dedej dhe Qazim Merkja janë konfliktuar me vëllezërit Marjus Aliu dhe Denis Aliu.
Bëhet me dije se grupi hetimor ka sekuestruar në cilësinë e provave materiale tre automjete, te cilat janë përdorur nga autorët e dyshuar, aparate celularë, fishekë luftarakë si dhe një sërë provash të tjera, të cilat janë dërguar për ekzaminim të mëtejshëm laboratorik.
