Shumë biznese u mbyllën, për shkak të pandemisë. Kriza preku hotelet, baret, restorantet, të cilat qëndruan të mbyllura për më shumë se dy muaj, pasi paraqisnin një rrezikshmëri të lartë për përhapjen e koronavirusit. Bashkia e Tiranës ka marrë dy vendime të rëndësishme për biznesin. Lehtësime vijnë për baret, restorantet dhe hotelet.
Erion Veliaj foli për heqjen e taksës për hapsirën publike deri në qershor. Ai tha se kjo është një ndihmë për baret e restorantet. Po kështu ka propozuar anulimin e taksës së hotelit deri në gjysmën e shtatorit. Bëhet fjalë për mbi 300 hotele në Tiranë të cilat përfitojnë.
“I propozoj Këshillit me heqjen e taksës për hapësirën publike për periudhën mars-qershor, do ta zerojmë tani që hapen. Kjo nuk do të thotë zaptim, por atë që ke, e ke pa pagesë. Është një ndihmë për të gjitha baret dhe restorantet. Në 1 qershor do të hapim Parkun Rinia, mund të përdoret edhe për një klasë në ambient të hapur.
Pra bëhen katër muaj, mars, prill, maj dhe qershor. Anulojmë taksën e hotelit deri në gjysmën e shtatorit, përfitojnë mbi 300 hotele në Tiranë. Për t’i mbajtur për investime për të tërhequr klientët në Tiranë. Në një qytet që nuk ka det, por ka pafund vende për të parë, nga muzeu i Gjetheve, te Bunk’Art, më kujtohet si po ata njerëz e shqyen Bunk’Artin, kur sot Bunk’Art na del muzeu numër një, nuk e di në Shqipëri, por në Tiranë është pak, por e sigurt”, tha ai.
