Qytetarët do të dalin sërish në protestë sot kundër rritjes së çmimeve në orën 11:00 para godinës së Kryeministrisë. Organizimi për këtë marshim ka nisur një javë më parë, me thirrje dhe shpërndarje të protestës në rrjetet sociale. Organizatorët e protestës kanë kërkuar nga qeveria që të reagojë ndaj kërkesave të tyre. Në të kundërt paralajmërojnë përshkallëzim të protestave, duke bllokuar rrugën dhe protestuesit do të ulen në tokë.
Komisioni Evropian i ka cilësuar protestat që u zhvilluan në Tiranë për rritjen e çmimeve legjitime, si në gjithë Ballkanin Perëndimor. Qytetarët në Shqipëri dhe në gjithë Ballkanin Perëndimor, kanë shqetësime legjitime për rritjen e çmimeve, thotë Komisioni Evropian.
Deklarata vjen pas pyetjeve të dërguara nga partneri mediatik i EURACTIV, pasi kryeministri Edi Rama tha se një zyrtar i Brukselit kishte thënë se protestat i shërbenin Rusisë dhe Kremlinit dhe kishte pyetur se kush i organizonte ato. Nënkryetari i KE-së Josep Borrell u shpreh se protestat, se grumbullimet e qytetarëve kanë qenë paqësore e se rritja e çmimeve është rënduar në masë të madhe.
Komisioni Evropian shprehet se qytetarët shqiptarë kanë shqetësime lidhur me rritjen e çmimeve. “Qytetarët në Shqipëri, si dhe në pjesën tjetër të Ballkanit Perëndimor dhe më gjerë, kanë shqetësime legjitime për rritjen e çmimeve të karburanteve dhe ushqimeve”, tha Komisioni.
Ndër të tjera, Komisioni Evropian theksoi se kërkesat kyçe të anëtarësimit të vendit në Bashkimin Evropian janë respektimi i standardeve evropiane për të protestuar. “Bashkimi Evropian rikujton se respektimi i standardeve evropiane për lirinë e grumbullimit paqësor, dhe për mbrojtjen dhe përfshirjen e grupeve të cenueshme, janë kërkesat kyçe të anëtarësimit që monitorohen nga afër. Të gjithë aktorët e përfshirë duhet të ushtrojnë qetësinë dhe përmbajtjen maksimale”, shtoi Komisioni Evropian.
