Kryeministri Edi Rama në një takim me gazetarët ka komentuar marshimin opozitarë që u mbajt një ditë më parë në katër institucionet e inkriminuara në Tiranë sipas tyre. Me tone të ashpra Rama e quajti një marshim absurd dhe se me këtë mënyrë nuk rrëzohet qeveria, po ashtu u shpreh i prerë se nga këto veprime mund të preken shumë gjëra, por vetëm qeveria jo.
Rama po ashtu foli edhe për të arrestuarit ku u shpreh se ata do ti bëjnë disa pyetje vetes para se të marrin përsipër të bëjnë veprime të dhunshme, e kjo për faktin se në darkë ata që drejtojnë pasi lenë mikrofonët shkojnë dhe flenë në shtëpitë e tyre.
“Goditjet e djeshme mbi Drejtorinë e Përgjithshme të Policisë dhe Parlamentit kërcënuan jetën e uniformave blu, duke u krijuar plagë të lehta. Ishte një xhiro dëshpërimi të atyre që ikën nga Parlamenti, që krijoi presion tek banorët dhe kalimtarët, një marshim absurd.
As me marshime nuk rrëzohet qeveria, nuk janë molotovi, kapsollat apo çdo gjë e tillë për të marrë pushtetin. Por vetëm ndikon në prishjen e imazhit të Shqipërisë tek të huajt.
Para se të vija këtu po diskutoja me një grup biznesmenësh, që ishin shumë të shqetësuar. Pasi menjëherë pas publikimit të atyre imazheve ka anulime të prenotimeve që kishin bërë turistët. Pra ka ndikim negativ në ekonomi. Ky është një shqetësim real, që në emër të gjithë atyre që thuhet jo vetëm që nuk sjellin investime, por i bëjnë keq Shqipërisë edhe shqiptarëve.
E vetmja pjesë që nuk ka shans të preket nga e gjithë kjo është qeveria dhe shumica qeverisëse. U bëj thirrje të gjithë atyre që u shkojnë nga pas këtyre udhëheqësve të verbuar dhe të trishtuar nga humbja, se nuk janë ata udhëheqësit e verbër që dëmtohet ekonomia e tyre familjare, nuk janë pushimet e tyre të verës që cenohen, as xhepat e tyre, por në radhë të parë jeni ju që i ndiqni pas.
Të arrestuarit e djeshëm janë njerëz të nxitur dhe të manipuluar për dhunë. Ata do ta pyesin veten pse e bëra, ca fitova, pse po e shkel ligjin, e do përballem me ndëshkimin që ligji jep në këto raste. Do përmirësohet jeta ime, ekonomia ime, jo s’ka shans, vetëm do përkeqësohet pozita ku jetojnë, ndërkohë që ata shkojnë flenë në shtëpitë e tyre pasi mbarojnë punë me mikrofonat. Është një pyetje që të gjithë duhet t’ia bëjnë vetes,” u shpreh Rama.