Pas dy sezoneve fantastike në Premier League, Guardiola pritet që të japë lamtumirën me Manchester Cityn. Dy sezone me pikë rekord, kanë bërë të hapen diskutime nëse City është skuadra më e mirë në historinë e kampionatit anglez.
Çdo ekip në botë do të ishte krenar nëse do të kishte trajner Guardiolën, pasi suksesi është i garantuar. Trajneri katalan është i përkushtuar në çdo moment në përmirësimin e skuadrës dhe i fokusuar për të fituar trofe.
Por pavarësisht suksesit në Angli, zhgënjimi i Guardiolës në Champions League vazhdon ta ndjekë që pas largimit nga Barcelona. Për të bërë të mundur këtë të fundit, ish-trajneri i Bayern Munich flitet se ka arritur një marrëveshje me gjigantin italian, Juventusin.
Gazetari i Radio Sportiva, Federico Gennarelli shkroi të martën mbrëma se kontrata katër vjeçare e Guardiolës me Zonjën e Vjetër ishte një “marrëveshje e kryer”.
Megjithatë, javën e kaluar Guardiola e mohoi se do të largohej nga ‘Qytetarët’, pasi tha se ka edhe dy vite të tjera nën kontratë.
