Në kuadër të arritjes së një marrëveshjeje për koalicion qeverisës, dy grupet punuese të Lëvizjes Vetëvendosje dhe Lidhjes Demokratike të Kosovës do të zhvillojnë ditën e sotme një tjetër takim.
Përgjatë një interviste për “KosovaPress”, kreu i Vetëvendosjes Albin Kurti deklaroi se në takimin e grupeve punuese me LDK-në do të diskutohet për çështje ekonomike, teksa bëri të ditur se shumë shpejt pritet të diskutojë me kryetarin e LDK-së, Isa Mustafa.
Kurti, i cili synon postin e kryeministrit, tha se ende nuk i kanë ndarë postet ministrore, pasi sipas tij fokusi fillimisht është te riorganizimi i tyre. Ndryshe, nga takimi i fundit, dy partitë kanë deklaruar se janë pajtuar që qeveria e tyre të mos ketë më shumë se 12 ministri. Takimi i parë LDK-VV pas zgjedhjeve ka ndodhur mes dy kandidatëve për kryeministër, Albin Kurtit dhe Vjosa Osmanit, e shoqëruar nga kryetari i LDK-së, Isa Mustafa. Kujtojmë se në zgjedhjet e 6 tetorit, Lëvizja Vetëvendosje doli e para, pasuar nga Lidhja Demokratike e Kosovës.
