I ngarkuari i posaçëm i SHBA-së për Ballkanin Perëndimor, Matthew Palmer, duke folur për dialogun Kosovë-Serbi, shprehu bindjen se mund të arrihet një marrëveshje.
Palmer u prononcua për një media të Malit të Zi, se bisedimet mes Kosovës dhe Serbisë duhet të jenë më serioze, në mënyrë që të ketë një marrëveshje, që do ndihmonte Serbinë në rrugën drejt BE-së.
“Do të ishte ideale të bazohej në njohjen e ndërsjellë. Në kohën kur të dyja palët të kthehen në tryezën e bisedimeve, ne do të jemi atje si partnerë në kërkim të një marrëveshjeje që do të jetë e pranueshme për të gjithë, e qëndrueshme dhe e drejtë dhe që do të ndihmojë Serbinë në rrugën e saj drejt BE-së”, u shpreh Palmer.
Matthew Palmer theksoi se vendi i tij do ta përkrahë edhe Kosovën, por që më parë ajo duhet të pezullojë taksën 100% ndaj mallrave.
“Një nga qëllimet tona kryesore është të mbështesim formimin e një qeverie në Kosovë e cila është e angazhuar për dialog, që do të thotë pezullimin e taksës dhe kthimin në tryezën e bisedimeve”, deklaroi Palmer.
