Shtetet e Bashkuara të Amerikës kanë braktisur marrëveshjen bërthamore me Iranin. Kjo u konstatua nga vetë presidenti Trump. Ai anuloi zgjatjen e kësaj marrëveshjeje për denuklearizimin e Iranit, të cilin e quajti një regjim fanatik.
“Teherani financon terrorizmin dhe ne nuk mund të lejojmë që të ketë një bombë atomike. Detyra ime parësore është të garantoj sigurinë e popullit amerikan”, tha Trump.
Presidenti Donald Trump theksoi se do të raportojë në Kongres dhe do të këshillojë aleatët të ndalojnë marrëveshjen e vitit 2015, të cilën ai e cilësoi edhe një herë si më të keqen që kanë bërë SHBA-të. Trump shpjegoi se bashkë me Kongresin do të hartojë një plan më të ashpër sanksionesh ndaj Iranit. Tërheqja nga ujdia bërthamore ishte paraprirë pak orë më parë nga presidenti amerikan kur u bëri thirrje fuqive botërore për të kërkuar që Irani t’i japë fund vdekjes dhe shkatërrimit.
BE: Marrëveshja nuk mund të prishet, funksion shumë mirë
Ndërkaq, Bashkimi Evropian ka reaguar në lidhje me qëndrimin e Donald Trump për të mos rimbajtur marrëveshjen bërthamore me Iranin. “Marrëveshja bërthamore me Iranin po funksionon shumë mirë dhe vazhdon që ta ndalojë vendin që të zhvillojë armët atomike”, tha shefja e politikës së jashtme për BE-në, Federica Mogherini.
Mogherini tha se asnjë vend nuk mund të prishë marrëveshjen që Britania, Franca, Gjermania, Rusia, Kina dhe BE-ja kanë firmosur të gjitha së bashku. Trump ka thënë se “nuk mund dhe nuk do që të mbajë” një marrëveshje të tillë me Iranin dhe kërcënoi se do t’i japë fund asaj nëse Kongresi nuk propozon një marrëveshje tjetër më të mirë.