Pak ditë pas marrjes së detyrës së kryeprokurores, Arta Marku është paditur nga prokurorja Rovena Gashi. Prokurorja në detyrë Gashi ka bërë një kallëzim pranë Gjykatës Administrative, ndërsa ka kërkuar rikthimin në detyrë si drejtuese e Njësisë së Dekriminalizimit, pasi sipas saj, shkarkimi i saj është i lidhur me propozimin që ka bërë për ndërprerjen e mandateve të Rehovicës dhe Rakipit.
Ajo kërkon që vendimi të pezullohet dhe vendimi për shkarkimin e saj të shpallet i pavlefshëm.
“Vendimi për lirimin tim është absolutisht i pavlefshëm. Të pezullohet vendimi i lirimit si Drejtore e Marrëdhënieve me Jashtë. Prokurorja e Përgjithshme e Përkohshme ka uzurpuar kompetencat e Këshillit të Larte të Prokurorisë. Lirimi nga detyra është bërë pas kërkesës për ndërprerjen e mandatit për Aqif Rakipin dhe Gledion Rehovices” thuhet në padinë e Gashit drejtuar Gjykatës Administrative.
Prokurorja Gashi pas ardhjes në detyrë të Arta Markut, është zëvendësuar me Arqile Koce, ndërsa pritet të shqyrtohet padia e saj ku do të mësohet për fatin e saj nëse do të kthehet apo jo. Vendimi në lidhje me padinë pritet të merret javën e ardhshme nga ana e Gjykatës Administrative. Ndërsa beteja ligjore e Gashit do të vazhdojë për të kërkuar shfuqizimin e vendimit për shkarkim nga detyra nga ana e kryeprokurores së përgjithshme.
