Partizani mbas katër javësh nuk arrin të shënojë asnjë gol dhe pëson katër të tillë. Grumbullon vetëm dy pikë dhe qëndron i fundit në tabelën e klasifikimit. Ky është një dështim shumë i madh për ata që u cilësuan si pretendentë për titull por që të kundërtën po shohim në këto javë të para. Për teknikun italian Iuluano gjithçka duket në rregull dhe shprehet se zhvilluan një ndeshje të mirë por nuk patën fat në shënimin e golave. Ai shprehet se ka besimin e drejtuesve dhe nuk rrezikon të shkarkohet.
“Ishte një ndeshje e dominuar dhe me shumë raste, por fatkeqësisht nuk kemi arritur të shënojmë gola. Mbase duhet të shënojmë gol në mënyrë të fortë. Do të kishte qenë e drejtë që çunat të ishin shpërblyer me gol, për lojën dhe rastet e krijuara. Ndonjëherë rezultati nuk shpërblen. Unë mendoj për punën time dhe detyra e trajnerit është që të nxjerrë maksimumin nga lojtarët dhe të bëjë që skuadra të bëjë lojë të mirë. Nuk mund të them se ekipi nuk i përgjigjet pretendimeve të mia, sepse kemi dominuar dhe nuk patëm fat. Lojtarët kanë sakrifikuar. Roli i trajnerit është gjithmonë më i rrezikuar, kur mungojnë rezultatet. Unë jam i qetë sepse po punoj në kushte të mira dhe ndjej besimin e drejtuesve. Sa i përket Çanit, do ta kemi në fushë kur ai të jetë në formën e tij më të mirë, shpresoj të jetë sa më shpejt”.
