Të tjera detaje kanë dalë në lidhje me atentatin me armë zjarri mëngjesin e sotëm në fshatin Poro, ku mbeti i vdekur 22 vjeçari, Sotiraq Mëhilli dhe u plagos rëndë, Eno Mata, 32 vjeç.
Ky i fundit, i njohur edhe me emrin Aleksandro Mata, mendohet të ketë qenë edhe objektivi i atentatit, pasi është i kërkuar për vrasjen e avokatit grek Mixaleis Zafeiropoulos, ngjarje e ndodhur në tetor të vitit 2017 në Athinë. Mata dyshohet se është një nga dy ekzekutuesit e avokatit në fjalë.
Po ashtu, në janar të 2018-ës, Eno Mata, i konsideruar si një nga shqiptarët më të kërkuar në Greqi, ka marrë pjesë në grabitjen e një argjendarie në lagjen “Ambelokipi” të Athinës. Ai dhe bashkëpunëtori i tij sulmuan argjendarinë dhe nën kërcënimin e armës morën bizhuteri, si dhe goditi vajzën e pronarit të argjendarisë.
Më pas u arratisën me një makinë që dyshohet se ishte e vjedhur. Ai është filmuar nga kamerat e sigurisë së biznesit dhe është identifikuar nga ana e hetuesve grek.
Në qershor të vitit 2018, Eno Mata kishte marrë pjesë në një tjetër grabitje, ku kishte lënë edhe një shënim për policinë me mbishkrimin “Maradona fluturues” dhe deklaronte se nuk është i përfshirë në vrasjen e avokatit Zafeiropoulos.
