Një tjetër person ka ndërruar jetë nga koronavirusi në Maqedoninë e Veriut.
Sipas mediave vendase, bëhet fjalë për një 70-vjeçar nga Llabunishta e Strugës, që po kurohej në Spitalin “8 shtatori”. Kështu shkon në 55 numri total i viktimave të shënuara nga virusi vdekjeprurës.
Ndërkohë janë shtuar edhe shtatë raste të reja infektimi në 24 orët e fundit. Tre prej rasteve janë regjistruar në Tetovë , dy në Kumanovë dhe dy në Kocani. Që nga shpërthimi i COVID-19, në Maqedoninë e Veriut janë regjistruar 1,231 raste me koronavirus.
Sipas Ministrisë së Shëndetësisë, 24 persona janë shëruar sot nga ky virus, duke e çuar në 224 numrin total të personave që e kanë mposhtur koronavirusin.
Në Klinikën Infektive në Shkup janë shtruar gjithsej 60 pacientë, prej të cilëve 18 janë në mbështetje të oksigjenit.
Në Spitalin “8 shtatori” janë shtruar gjithsej 45 pacientë me COVID-19, prej të cilëve 7 janë në gjendje më të rënduar shëndetësore.
Në Klinikën e Manastirit ka gjithsej 13 pacientë me COVID-19, kurse nën monitorim të Klinikës ka edhe 15 pacientë të cilët po kurohen në kushte shtëpiake.
Në Spitalin e Shtipit ka 4 pacientë, kurse po monitorohen 19 pacientë të cilët trajtojnë sëmundjen në kushte shtëpiake.
