Në qershor pritet të nisin negociatat e Maqedonisë me Bashkimin Evropian. Kështu, ka deklaruar zv/kryeministri për Çështje Evropiane, Bujar Osmani në Kuvend.
Ai tha se nëse kryhen reformat ashtu sic duhet, atëherë në qershor do të nisin negociatat për integrimin në BE.
Osmani tha gjatë fjalës së tij në Kuvend se përgjegjësia politike e pushtetit dhe opozitës është marrja e datës për fillimin e negociatave, ndërsa ftoi për konsensus të shumicës parlamentare dhe opozitës për plotësimin e obligimeve.
“Të ndalim agjendat partiake deri në qershor, për të arritur qëllimet, pasi që nuk e dimë se kur mund të kemi sërish një mundësi të këtillë politike. Në janar fillon përgatitja e raportit, ndërsa ne reformat duhet t’i zbatojmë deri më 31 dhjetor. Shtyllat kryesore janë reformat në gjyqësor, shërbimet sekrete dhe administrata publike”, deklaroi Osmani.
Osmani tha se deri më 31 dhjetor duhet të sillen ligjet për Këshillin për fakte dhe Këshillin gjyqësor për mbrojtje të dëshmitarëve, duke shtuar se periudha e ardhshme është kyçe për Maqedoninë.
