Ish-presidenti kroat Ivo Josipoviç tha se Serbia nuk mund të anëtarësohet në Bashkimin Evropian pa njohur pavarësinë e Kosovës.
Josipoviç tha në një intervistë për Danas se në kohën e mandatit të tij, ai dhe ish-presidenti serb Boris Tadiç kishin bërë hapa të rëndësishëm për të përmirësuar marrëdhëniet mes dy vendeve, ndërsa tani, tha ai, presidentët e dy vendeve po përdorin çdo mundësi për “minimin dhe rritjen e tensioneve”.
I pyetur nëse Kroacia do të pengonte hyrjen e Serbisë në Bashkimin Evropian, ai u përgjigj se kjo nuk duhet të ndodhë dhe se ai beson se “kuptimi i përbashkët do të mbizotërojë”, sepse anëtarësimi i Serbisë do të rriste sigurinë rajonale dhe do të forcojë ekonomitë e të dy vendeve.
Josipoviç gjithashtu vlerësoi se Serbia nuk mund të bëhet anëtare e BE nëse nuk e njeh Kosovën.
“Hyrja e Serbisë në BE pa njohjen e Kosovës do të thotë që Kosova nuk do të jetë kurrë anëtare e BE. Një zvogëlim i tillë i projektit të Evropës së bashkuar nuk është i pranueshëm”, tha ai duke shtuar se shpreson se të dyja vendet do të hyjnë në BE. TIRANA TODAY
