Ish-ministri i Drejtësisë ka komentuar protestën e sotme, të cilën e ka cilësuar si të dhunshme, por këtë herë jo nga ana e protestuesve.
Manjani shkruan se pati policë të acaruar, bllokim rrugësh dhe gjoba pa shkak ndaj shoferëve, ushtarë të gardës me maska nëpër tarraca, blinda policie dhe bllokim të valëve të telefonisë. Sipas Manjanit, e gjithë kjo bëhet për shkak se opozita dorëzoi mandatet, ndërsa ironizon se kjo dhunë nuk denoncohet nga asnjë ambasadë.
“Po nuk u denoncua kjo lloj dhune, kur kërcet pushka është vonë. S’ka më kuptim denoncimi…”, përfundon Manjani në një postim në Facebook.
Reagimi i plotë:
Sa për saktësim.
Protesta e sotme ishte e DHUNSHME!
Policë të acaruar që kishin humbur çdo komunikim njerëzor ishin gjithandej.
Roje private te sigurisë kyçnin dyert e bisnesve e bankave se kishte urdhëruar policia.
Njoftime mediatike e statuse gazetarësh me porosi nga policia për fuqinë e madhe të lendëve helmuese që zotëronte policia, e gatshme për ti hedhur njerëzve.
Bllokim rrugësh kombëtare dhe gjoba pa shkak ndaj shoferëve të mjeteve të transportit masiv drejt Tiranës.
Tela me gjëmba e gardhe të sajuara në parlament e kryeministri.
Blinda policie të parkuara buzë rrugëve kryesore rreth Bulevardit.
Ushtarë të gardës me maska nëpër tarraca.
Dhe bllokimi i valëve të telefonisë, pronë publike kjo, me urdhër privat!
E për çfarë gjithë kjo dhunë?! Se dorëzoi Opozita mandatet!
E gjithë kjo dhunë nuk denoncohet nga asnjë ambasadë…
As dëmtimi i pasurisë publike (valët e komunikimit) nuk denoncohet…
Po nuk u denoncua kjo lloj dhune, kur kërcet pushka është vonë. Ska më kuptim denoncimi…
