Ish-ministri i Drejtësisë, Ylli Manjani ka një periudhë të gjatë që ka qëndruar disi i shkëputur nga LSI. Megjithatë, ai mbështet plotësisht protestën e nesërme të PD dhe LSI, për të cilën thotë se madje është paksa e vonuar, ndërsa i tha Kryemadhit që të mos kërkojë më ndjesë për bashkëkoalicionin me Ramës, sepse partia tashmë po vuan kostot.
Manjani foli sot në mbledhjen e Komitetit Kombëtar Drejtues të LSI, ku u shpreh pro largimit të menjëhershëm të opozitës nga parlamenti:
“Unë jam për largim të menjëhershëm nga ky parlament dhe për një sjellje minimalisht të kushtëzuar dhe nuk mund të marrim kostot e moskryerjes së detyrave politike kushtetuese si opozitë.
Këta të tjerët janë hiç, zero. Tani më falni për fjalorin jo të këndshëm, por kjo quhet as më pak as më shumë, diktaturë në kushtet e pluralizmit asgjë tjetër. Dhe kjo diktaturë nuk sulmohet në parlament. Sulmohet në rrugë, unë nuk di zgjedhje tjetër. Doja ta bëja këtë ndërhyrje sepse më konsideroni mua ekstremin, s’ka problem nuk është kjo tema.
Unë e di që nuk do merret vendim sot, por duhet ta konsiderojmë seriozisht këtë opsion. Për të mos qenë më anëtar të këtij parlamenti që ka marrë fund që në krijimin e tij. Kjo nuk është çështje punësimi, apo ça të doni ju. Edhe te stopojmë së kërkuari ndjesë sepse s’ia kemi kujt borxh. E kërkuam, ndjesë morëm edhe kostot që qeverisëm me ta, që i mbajtëm në pushtet. Nuk kemi ç’të kërkojmë më ndjesë. Tani është momenti për veprim politik. Dhe veprimi politik ngjit me ngjarje politike me sjellje politike”, shtoi më tej Manjani.
Po ashtu Manjani tha se Ramës nuk i bëjmë dot oponencë, por duhet veprim politik për të mngjitur fjala.
“Nuk i bëjmë dot oponencë atij me gjithë mediat me vete që i dominon vet. Vjen atje për të bërë atë show-in, më falni për shprehjen bën nevojat personale. Ça i thoshte Saliut i bën vet sot. Ça kuptimi ka? Kuptimi i vërtet është sjellja politike. Nesër po në protestë patjetër. Nuk diskutohet. Jemi vonë madje, duhet ta kishim bërë pak më shpejt po hajde po themi që sa kishim dalë nga zgjedhjet edhe kjo është e vërtetë. Por çështja është që të na ngjisi fjala duhet veprimi politik. Këtë merak kisha, më falni që e përsërita por doja ta thoja”, përfundon deklaratën Manjani.
