Para disa minutash ka nisur seanca e jashtëzakonshme në Kuvend dhe nga foltorja, kryetari i Komisionit të Ligjeve Ulsi Manja, prezantoi raportin për kërkesën e shkarkimit të presidentit Ilir Meta. Manja theksoi se ai e ka vënë në dijeni me anë të një shkrese presidentin e vendit për këtë kërkesë, por sipas tij, Meta i është përgjigjur në mënyrë joetike dhe fyese.
“Kam vënë në dijeni presidentin Ilir Meta me qëllim garantimin e tij për ta vënë në dijeni. Shkresës së tij iu përgjigj sekretarja e Përgjithshme e Presidentit të Republikës. Në këtë shkresë që përmban një gjuhë jo etike, jo qytetare, fyese, nëpërmjet sekretares së Përgjithshme, Presidenti i Republikës deklaroi qartazi se nuk kishte interes për t’u dëgjuar në Komisionin e Ligjeve. Komisioni i dha kohë të mjaftueshme Metës për mbrojtje”, tha Manja.
