“Çoji cigare shokut te 313, se ke dy atje”. Ishin këto fjalët e kryedemokratit Basha ndaj ministrit të Drejtësisë, Ulsi Manja, duke e thumbuar edhe për dënimin e ish-ministrit të Brendshëm, Saimir Tahiri. Gjatë seancës plenare të zhvilluar ditën e sotme, ku po diskutohet për zgjatjen e afatit të organeve të Vettingut, nuk kanë munguar debatet mes Manjës dhe Bashës. Teksa ministri i ka kujtuar Bashës praninë e prokurorëve belgë në Tiranë për çështjen “Toyota Yaris”, Basha i është përgjigjur me ironi duke thënë që tu çojë cigare dy shokëve të tij në burgun 313, duke iu referuar Lefter Kokës dhe Saimir Tahirit.
“Ministri duhet të ishte dënuar minimalisht për zbardhjen që u bë. Kujtohu pak për ministrin e Brendshëm. Do vij dita që të japësh edhe ti llogari. Çoji cigare shokëve te 313 se ke dy atje.
Tani e kuptoj pse është e rëndësishme të mos i lëmë horrat dhe banditët, që të festojnë një ditë kur ONM të largohet dhe gjyqtarët e prokurorët jo 50-60% siç i emëron sot Ulsiu, por t’i emërojnë 100% këta. E kuptojmë ankthin e tyre, Dibra është një krim i pagjykuar.
Ky që i premtonte hajdutit të votave promovimin, është promovuar vetë. Ja kam thënë dhe ambasadorëve, që e kanë për detyrë të takojnë ministrin e Drejtësisë, që duart po ja japin aleatëve të krimit. Që ai që është sot ministër Drejtësie, në një vend normal do të ishte dënuar.
Ka një gjë, drejtësia mund të vonojë, sa më shumë vonon, aq më shumë dëmton, por nuk mungon. Kujtohu pak për ish-kolegun tënd, ministrin e Brendshëm, dhe kapërdisjen e tij, majë më majë, shesh më shesh, madje edhe rrugëve të botës. Mendohu mirë Ulsi Manja, se për momentin mund të të duket vetja i përkëdhelur, i mbrojtur, por harroje ti se nuk do të vijë dita që të japësh llogari edhe ti me pjesën tjetër të bandës së strukturuar kriminale për dosjen 184”, tha Basha.
