Manchester United ka pësuar një disfatë të pabesueshme kundrejt vendit të fundit, WBA dhe i ka dhuruar njëkohësisht edhe titullin kampion Manchester Cityt. Prej disa javësh titulli e kishte marrë rrugën drejt “Ettihad Stadium”, por matematika e mbante ende pezull atë.
Por pas kësaj humbje të djemve të Jose Mourinhos edhe matematika u dorëzua dhe Mançester Siti shpallet zyrtarisht kampion i Anglisë një ditë pasi mposhti 3-1 skuadrën e Tottenhamit në transfertë. “Dhurata” i është bërë nga rivalët e Mançester Junaitid, që u mposht në shtëpi nga Uest Brom i vendit të fundit.
Rodriguez shënoi golin e vetëm të takimit në minutën e 73-të të ndeshjes, duke u dhënë miqve një trepikësh me mjaft vlerë në luftën për mbijetesë, megjithëse mbeten ende në fund të tabelës, ndërkohë që United, edhe pas kësaj humbjeje mban vendin e dytë në tabelën me 71 pikë, një më shumë se Liverpuli.
