Mali i Zi shënon sot Ditën e Shtetësisë, ku kujtohet 13 korriku i vitit 1878, kur u pranua si shtet i pavarur nga Kongresi i Berlinit.
Gjithashtu, përkujton sot ditën kur populli malazez filloi kryengritjen kundër fashizmit, më 1941.
Presidenti Filip Vujanoviç, me rastin e Ditës së Shtetësisë organizoi mbrëmë një pritje për mysafirë, para të cilëve tha se viti 2017 do të mbetet i shënuar në historinë e Malit të Zi:
“Në vazhdën e viteve historike të Malit të Zi, edhe ky vit padyshim se do të ketë vend të merituar në historinë tonë. Në shtetin i cili njihet për luftën shumëshekullore për liri dhe pavarësi, vitet e arritjes së këtij synimi janë vlerë e përhershme. Që të mos përsëritet historia, tha më tej Vujanoviç, Mali i Zi duhet të ketë një aleancë që do të garantojë stabilitet dhe përjetësinë”.
Pavarësia e Malit të Zi u shpall më 3 qershor 2006, ndërkohë që më 28 qershor të atij viti, Mali i Zi u bë anëtar i 192-të i Kombeve të Bashkuara.
