Zyrtarët malazezë dhe ekspertët kosovarë mendojnë se Mali i Zi nuk do ta pranojë rinegocimin e Marrëveshjes për Shënjimin e Kufirit me Kosovën, duke u bazuar në zhvillimet e fundit.
BE-ja ka rikonfirmuar se pa ratifikimin e kësaj marrëveshjeje, nuk do të ketë plotësim të kushteve për liberalizim, gjë që Haradinaj e ka premtuar se do ta realizojë në tre muajt e parë të qeverisjes së tij.
Komisioni i ri Shtetëror për Demarkacion, i caktuar nga kryeministri Haradinaj dhe i udhëhequr nga Shpejtim Bulliqi, ende nuk ka dalë me të gjeturat e reja sa i përket Marrëveshjes së Kufirit me Malin e Zi.
Qeveria e Kosovës është në pritje të tyre, por pavarësisht kësaj është pala malazeze ajo që nuk pritet të pranojë rinegocimin e kësaj marrëveshjeje.
Sipas njohësve të marrëdhënieve ndërkombëtare, nëse Kosova dëshiron të përfitojë nga liberalizimi i vizave më shpejt, mënyra e vetme është ratifikimi i kësaj marrëveshjeje.
Ndërsa analistët politikë vlerësojnë se veprimet e njëanshme nga Qeveria e re e Kosovës mund të ngrijnë raportet e mira mes dy shteteve.
