Dritan Abazoviç do të jetë kryeministri i ri i Malit të Zi. Politikani 36-vjeçar me origjinë shqiptare u votua të enjten në Kuvend, për të drejtuar qeverinë e 43 të vendit. Abazoviç mori 45 vota pro nga 81 deputetë që ka Parlamenti, ku 3 përfaqësues të Socialdemokratëve votuan kundër. Dritan Abazoviç është politikani i parë shqiptar, i zgjedhur në krye të një qeverie në historinë malazeze. Ai do të jetë edhe kryeministri i tretë në rajon, pas Edi Ramës dhe Albin Kurtit.
Për kabinetin e Abazoviçit votuan 16 deputetë të partive që përbëjnë Qeverinë nga Lëvizja Qytetare URA, Partia Popullore Socialiste pro-Serbe (SNP), Partia Socialdemokrate (SDP) dhe partitë kombëtare të shqiptarëve, boshnjakëve dhe kroatëve, si dhe 29 deputetë të Partisë Demokratike të Socialistëve (DPS) të Millo Gjukanoviçit, i cili nuk ka përfaqësues në Qeveri.
Qëllimi i Qeverisë së re është të zhbllokojë procesin e integrimit evropian të Malit të Zi dhe zgjedhjen e pozitave udhëheqëse në Gjyqësor, theksoi kryeministri Abazoviç.
Në seancë nuk morën pjesë deputetë nga Fronti Demokratik Pro-Serb dhe Demokratët, të cilët kundërshtojnë fuqishëm Qeverinë e pakicës të mbështetur nga DPS-ja.
Abazoviç tha në fjalimin e tij të enjten se ai dëshiron të bashkojë fraksionet kundërshtare të Malit të Zi, nën një vizion të “një kombi demokratik, pa korrupsion dhe ekonomikisht të begatë që do të bëhet pjesë e BE-së 27-anëtare”.
“Ne kemi një mundësi përpara nesh që nuk duhet ta humbasim”, tha Abazoviç. “E ardhmja jonë është evropiane”.
