Ish-deputeti socialist Arben Malaj, i ka bërë thirrje kryeministrit Rama të gjejë kompromiset për krizën e krijuar politike, dhe të ofrojë zgjidhje për mos ngadalësimin e ekonomisë. Gjatë një interviste të dhënë në emisionin “KafeIN”, ai u shpreh se Rama do të gjejë një zgjidhje, por kjo duhet të jetë pa kosto.
Sipas tij, ekonomia po ndjen pasojat e këtij ngërçi. “Unë jam i bindur se ai do ta gjejë zgjidhjen. Por kjo duhet të bëhet pa kosto. Këmbanat po bien, dhe ekonomia po ndjen pasojat e këtij ngërçi. Nëse duhet një zgjidhje, duhet të bëhet tani, dhe jo vonë. Edhe sikur të duhet të lëshojë pushtetin, por jo detyrimisht partinë, por duhet të tregojë se është lider dhe të mos krijojë gropa në ekonomi që do t’i vuajnë shqiptarët”, tha më tej ai.
Referuar disa deklaratave të opozitës për mundësinë e përsëritjes së ngjarjeve si në vitin e mbrapshtë ’97, Malaj u kthye pas në kohë duke kujtuar faktin se bilancet e atij viti i paguan në kurriz taksapaguesit shqiptarë.
“Viti 1997 nga pikëpamja qeverisëse ishte dështim i plotë i PD, për të marrë zgjedhjet. Në njëfarë mënyre ishte dështim dhe i shqiptarëve. Bilancet e atij viti i paguan në kurriz taksapaguesit shqiptarë, viktima dhe bilanc negativ në ekonomi”, deklaroi akademiku dhe eksperti i ekonomisë Arben Malaj.
