Një aksident i rëndë ka ndodhur në fshatin Adriatik të Kurbinit. Tre persona kanë humbur jetën pasi makina me të cilën po udhëtonin ka rënë nga ura dhe ka përfunduar në kanal.
Brenda mjetit Lancia me targë AA 389 MO ndodheshin tre të rinj, të cilët kanë gjetur vdekjen e menjëhershme.
Për pasojë, kanë gjetur vdekjen të rinjtë, Jul Margjoni, 22 vjeç banues në Kombinat – Tiranë, Simon Kaza, 20 vjeç banues në Adriatik – Kurbin dhe Bert Marku, 17 vjeç banues në Adriatik – Kurbin.
Policia dhe një ambulancë kanë shkuar në vendin e ngjarjes, akoma nuk dihen rrethanat e plota të ngjarjes. Trupat e tre viktimave janë nisur drejt morgut.
Dyshohet se mjeti ka qenë me shpejtësi dhe drejtuesi nuk ka arritur të manovrojë në kohë, gjithsesi hetimet e policisë do zbulojnë edhe shkaqet e këtij aksidenti të rëndë.
Informacion paraprak
Më datë 01.05.2018, rreth orës 14:30, është marrë njoftim se në Adriatik -Kurbin, ka ndodhur një aksident automobilistik.
Menjëherë në vendngjarje kanë mbërritur shërbimet policore që kanë konstatuar mjetin tip Lancia me targë AA 389 MO , i cili kishte dalë nga rruga duke u përmbysur në kanalin anësor të rrugës.
Për pasojë kanë humbur jetën të 3 shtetasit që ndodheshin në mjet, J.M. 22 vjeç banues në Kombinat – Tiranë , S.K. 20 vjeç banues në Adriatik – Kurbin dhe B.M. 17 vjeç banues në Adriatik – Kurbin.
Grupi hetimor në bashkëpunim me Prokurorinë e Rrethit Gjyqësor Kurbin, po vazhdojnë hetimet për zbardhjen e plotë të shkaqeve të aksidentit.
