Kreu i PD-së, Lulzim Basha, është shprehur i hapur për një ndryshim të sistemit zgjedhor. Nisur nga rasti i deputetes Majlinda Halilaj, kryedemokrati është pyetur se ç’mendim ka për deputetët që nuk dinë të shkruajnë e të lexojnë.
Ai është shprehur se këta deputetë kanë dalë nga fundi i listave, dhe janë të ardhur nga partitë aleate. Duke qëndruar në të njëjtën linjë, ai ka thënë se një pjesë e mirë kanë ardhur nga listat e partive të vogla aleate. E gjitha kjo ka ndodhur në një proces për më pak se pesë ditësh. Pavarësisht kësaj, ka thënë më tej Basha, asnjëra prej këtyre nuk është justifikim.
Si ndiheni ju kur shikoni se sot në vendet tuaja janë ulur disa deputetë, të cilët është parë se nuk dinë të lexojnë e të shkruajnë, kur këta deputetë kanë dalë nga lista juaj, pra ju i keni firmosur?
“E para e punës, është një sëmundje e sistemit. Duhet të keni parasysh që këta, si rregull këta kanë ardhur nga fundi i listave, ku me thënë të drejtën edhe vëmendja e propozuesve të emrave ka qenë më e reduktuar.
Një pjesë e mirë kanë ardhur nga listat e partive të vogla aleate, nuk kanë ardhur si propozim i PD, por të aleatëve shumë të vegjël, që e kërkonin këtë si një afishim nominal të partisë dhe të logos së partisë, dhe e gjitha kjo ka ndodhur ne nje proces për më pak se pesë ditësh. Megjithatë, asnjëra prej këtyre nuk është justifikim. Është një shans për reflektim dhe për ndryshim që kjo të mos përsëritet më kurrë”, ka deklaruar Basha, në një intervistë për “News24”.
Majlinda Halilaj, është gruaja që zëvendësoi në Kuvend Lulzim Bashën, pasi ky i fundit vendosi të djegë mandatin e tij dhe gjithë grupit të PD. Fjalimi gjatë seancës plenare e deputetes Majlinda Halilaj, që ka zëvendësuar Bashën, ka ndezur rrjetet sociale. Deputetja e re u ngatërrua dhjetëra herë, dhe e justifikoi këtë më pas me faktin se kishte probleme me syrin.
Deputetja po përpiqet të shpjegojë si do të funksionojë Korporata e Investimeve. Paqartësitë e deputetes shkaktuan habi e të qeshura së pari tek kolegët që po e ndiqnin në sallë.
Pas shpërthimit të komenteve në rrjetet sociale, Majlinda Halilaj reagoi në Facebook, duke u përpjekur të shpjegohej, por gabimet drejtshkrimore nuk janë më pak se ato në të folur.
Ajo pretendon se prej një problemi në sy, nuk ishte e qartë për publikun.
CV-ja e deputetes:
Emri: Majlinda
Atësia: Skënder
Mbiemri: Halilaj
Datëlindja: 26.12.1977
Vendlindja: Tiranë
Arsimi: I lartë
