Ish-ministrja e Integrimit, Majlinda Bregu jep disa mesazhe të rëndësishëm për gratë dhe sidomos për ato që janë në vendimmarrje dhe në politikë. Në një video të postuar në blogun “Zëri i Integrimit”, i administruar nga Admir Malaj, ish-ministrja thotë se diskriminimi për shkak të gjinisë, është abuzim. Ajo shpjegon se në shumë raste me vajzat dhe gratë abuzohet me pagën, përfaqësimin në vendimmarrje por edhe kur ndaj tyre ushtrohet dhunë apo u kërkohet të bëjnë një krim si është aborti.
“Unë them më mirë edhe vajzë, edhe djalë. Dallimet mes gjinive janë biologjike, normale dhe të bukura. Por diskriminimi për shkak të gjinisë, është abuzim. Si në rastin e diferencave në pagë mes burrave e grave; në përfaqësimin e tyre në vendimmarrje apo më keq bëhet edhe krim si në rastin e abortit selektiv( djalë me çdo kusht) apo të dhunës në familje,” deklaroi Bregu.
Bregu e vendos theksin e saj të mesazhit që ka për vajzat dhe gratë në tre kolona dhe parime kryesore që duhen pasur parasysh.
Së pari: Duhen krijuar modele leadershipi të grave me vlera në politike dhe jo politika kuotash dhe numrash.
Së dyti: Duhen ndryshime ligjore për fuqizimin e grave që mbeten jashtë tregut të punës si pasojë e lindjes dhe rritjes së fëmijëve, duke u llogaritur, si hap i parë, si vite pensioni vitet e rritjes se fëmijëve.
Së treti: Aborti selektiv është një feminicid, pra vrasje e një gruaje, duhen dhe këtu zbatim i legjislacionit dhe ndryshim i tij për dënimin e këtij fenomeni, i cili dhe pse i përhapur kudo në botë, në Shqipëri mbetet problem.
