Mafia shqiptare e drogës po fiton gjithnjë e më shumë terren në territorin italian, ku sipas mediave italiane trafiku i drogës nga Shqipëria po mbyt shtetin fqinj.
Këtë të premte, duke cituar një raport të Drejtorisë Qendrore për Shërbimet kundër drogës, të Policisë Italiane, thuhet se krimi shqiptar i ka shtrirë thellë rrënjët në shtetin përtej Adriatikut.
Rezultatet e raportit për vitin 2017 tregojnë në veçanti “agresivitetin” e organizatave kriminale, marokene, nigeriane dhe shqiptare, raporton “Secolo d’Italia”.
Më tej media italiane shkruan: “Jo vetëm punëtorë. Të huajt tani po pushtojnë edhe nivelet më të larta të tregut të drogës, duke vënë në dyshim dominimin e ‘Ndrangheta”.
Në përgjithësi, të huajt të përfshirë në trafikim dhe shpërndarje droge janë rreth 14 mijë, nga të cilat mbi 10 mijë në paraburgim (+ 9.21% më shumë se gjatë vitit të kaluar). Pjesa më e madhe e trafikantëve dhe shitësve të drogës janë marokenë, shqiptarë, nigerianë, tunizianë, dhe senegalezë etj”.
Marijuhana
Ndërsa “La Repubblica” shkruan se raporti tregon një rritje të konsumit dhe sekuestrimit të marijuhanës, për shkak të rifillimit të tregtisë përmes dy anëve të Adriatikut.
Kokaina
“Bashkë me Ndrangheta-n kalabreze, që falë rrjetit të saj të degëzuar e kontakteve ndërkombëtarë arrin të mbulojë një rol qendror absolut dhe qendror në trafikun e kokainës në Itali, shihet një forcim të disa organizatave të huaja të përbërë nga marokenë, nigerianë dhe shqiptarë.
Shqiptarët në veçanti, si provë e një hapi të madh në kapacitetin e tyre operativ, ndryshe nga grupet e tjera kriminale, kontrollojnë rrugët e trafikut për në Itali si dhe rrjetin e shpërndarjes në territorin italian”, raporton “La Repubblica”.
Më tej në artikull, përmendet një rritje të numrit të shpërndarësve të drogës të arrestuar, pjesa më e madhe të cilëve nuk janë italianë, por marokenë, shqiptarë dhe afrikanë. Droga vazhdon të mbërrijë në Itali veçanërisht nga deti, evidenton raporti.
Burimi: secoloditalia.it
Përshtati: Tirana Today
