Barcelona pëson disfatën e dytë radhazi, pas barazimit me Valencian një javë më parë është ndalur sërish nga Celta Vigo në Camp Now dhe konfirmohet si “macja e zezë” e katalanasve. Barça e Vilanovës nuk arrin të shkojë më shumë se një barazim 2-2 dhe kështu përfitojnë ekipet që e ndjekin duke shkurtuar diferencën. Edhe këtë herë, ashtu si në sfidën me Valencian, nuk munguan polemikat. Suarez shënoi një gol të rregullt në pjesën e parë, por që nuk ishte i tillë për arbitrin e takimit, që vendosi të mos e akordojë.
Celta Vigo kaloi e para në avantazh, me golin e Aspas në minutën e 20′, por katalanasit u kundërpërgjigjën vetëm 2 minuta më pas me anë të yllit argjentinas Lionel Messi. Ky i fundit shfrytëzoi mjaft mirë një pasim të mesfushorit brazilian Paulinho dhe nuk fali përballë portierit.
Në minutën e 62-të ishte radha e uruguaianit Suarez, që të dërgonte topin në rrjetë dhe t’i jepte avantazhin Barcelonës. Gjithsesi, Celta nuk u dorëzua dhe këmbëngulja e saj u shpërblye vetëm 8 minuta më pas, me golin e barazimit, të shënuar nga Gomez.
Përfundon 2-2 dhe Barcelona nuk rrezikon të humbasë kreun e renditjes, por tani mund të reduktohet diferenca me ndjekëset, veçanërisht me Valencian dhe skuadrat e Madridit, nëse fitojnë ndeshjet respektive. Reali dhe Atletiko, nëse fitojnë sot, mund të shkojnë në -6 nga katalanasit, një rikuperim mjaft i rëndësishëm në vetëm 6 ditë, pasi javën e kaluar Barcelona kishte 10 pikë më tepër.
