Ndërsa po zhvillohet seanca e parë dëgjimore për një prej subjekteve të vettingut në sallën e Pallatit të Kongreseve, gjyqtarin e Kushtetueses Fatos Lulo, avokati i tij Ardian Visha ka paraqitur disa akte, sipas tij që provojnë të ardhurat e motrës së Lulos.
Para Komisionit të Pavarur të Kualifikimit, Visha ka thënë se të ardhurat e motrës, Drita Lulo janë tërësisht legjitime.
‘Periudha e viteve ’90, është e padrejtë që të gjykosh të ardhurat vetëm për faktin se zyra e tatimeve nuk mban mend.
Është vetëm 1 dhuratë 100 mijë euro, banesa është vetëm 1 ku jeton që prej 1992. Të mos spekulohet në media për dhuratat.
Paraqita një sërë aktesh, akte që provojnë të ardhurat e motrës së gjyqtarit, tërësisht legjitime. Znj.Drita Lulo ka 33% në kompaninë e ndërtimit.’, theksoi Visha.
KPK-ja ka dalë paraprakisht në konkluzionin se gjyqtari nuk e justifikon pasurinë dhe ka shtyrë për të premten seancën për të.
