Shefja e Infektivit, Najada Çomo, la mandatin e deputetit, për shkak të shtimit të rasteve me Covid-19 në vendin tonë. Kaq mjaftoi që të aludohej se një vendim të tillë, me gjasë mund ta ndërmerte edhe kryesuesja e listës së Partisë Socialiste në qarkun e Tiranës, Luljeta Bozo. Por ajo ka një koment në këtë drejtim, duke pohuar se nuk ka ndërmend të japë dorëheqjen nga mandati i deputetes.
“Nuk kam ndërmend të jap dorëheqjen nga mandati i deputetit. Njerëzit kanë shumë dëshirë të merren me thashetheme, mua më shtruan në Sanatorium, më bënë me COVID-19, sikur isha duke vdekur etj.
Unë shyqyr që nuk kam ‘Facebook’, dhe nuk i marr vesh këto lajme dhe i marr vesh më vonë nga njerëzit dhe shqetësohem më pak. Por, kush nuk ka punë do merret me llafe. Por meqenëse më pyetët nëse do të jap dorëheqjen, po ju them se unë nuk kam ndërmend të jap dorëheqjen ‘hë për hë’. Unë nuk kam filluar punën ende, si mund të jap dorëheqjen?! Të filloj njëherë punën dhe pastaj shohim…”, tha zonja Bozo për gazetën “Panorama” në një bisedë telefonike.