Ministrja e Integrimit Evropian e Kosovës, Dhurata Hoxha është takuar me udhëheqësen e Ambasadës së Luksemburgut në Kosovë, Anne Dostert.
Takimi u fokusua mbi bashkëpunimin në kuadër të procesit të integrimit evropian të Kosovës, me theks të veçantë në zbatimin e Marrëveshjes së Stabilizim Asociimit, liberalizimin e vizave dhe qasjen e Kosovës në Programet e BE-së.
Ministrja Hoxha dhe Dostert diskutuan për zbatimin e asistencës së Luksemburgut në Kosovë, ku u theksua se Luksemburgu do të përkrahë institucionet e Kosovës, teksa gjatë periudhës 2017-2020 do të nisin projekte të reja në vlerë 30 milionë euro.
Ministrja Hoxha vuri theksin mbi përkrahjen e procesit të integrimit evropian, për të cilën është paraparë realizimi i projektit që nëpërmjet asistencës teknike të punohet në ngritjen e kapaciteteve për zbatimin e MSA-së, respektivisht nëntë kapitujve të identifikuara si primare.
Dostert nënvizoi përkushtimin e vazhdueshëm të Luksemburgut për procesin e integrimit evropian të Kosovës dhe ofroi mbështetjen e vazhdueshme në kuadër të reformave konkrete në arsim, shëndetësi dhe sektorin e ujërave.
