Pas përplasjeve të ashpra mes militantëve të PD-së dhe forcave të policisë në KZAZ-të e disa qyteteve, ka reaguar edhe Ministri i Brendshëm Sandër Lleshaj.
Ky i fundit përgjatë një deklarate mediatike është shprehur se do të arrestohen dhe dënohen të gjithë ata që kryejnë shkelje elektorale: “Kryesisht punonjës bashkish e polici bashkiake po gabojnë rëndë duke u përdorur si mish për top. U bëj thirrje punonjësve publikë të mos marrin mbi vete barra ligjore për llogari të një grupi njerëzish që për interesa të tyre duan të marrin peng zgjedhjet”.
Lleshaj ka paralajmëruar po ashtu se do të shkrihen disa struktura të Policisë Bashkiake që kanë dalë haptazi jashtë funksionit të tyre: “Policia e Shtetit po provokohet e po sulmohet në mënyrë të organizuar. Qeveria do marrë masa të shkrijë disa struktura të Policisë Bashkiake që kanë dalë haptazi jashtë funksionit të tyre. Askush nuk do tolerohet, mund të jetë pak, por e sigurt”.
