Marinat ruse dhe amerikane kanë akuzuar njëra-tjetrën për incidentin që për pak çoi në përplasjen e dy luftanijeve në Oqeanin Paqësor.
Të dyja luftanijet ishin vetëm 50 metra larg njëra-tjetrës kur njëra nga ato ndërroi korsinë duke shmangur kështu përplasjen. Flota ruse e Vladimir Putin cilëson si fajtore flotën e Shteteve të Bashkuara duke e akuzuar anijen amerikane, USS Chancellorsville, për manovrim të rrezikshëm.
Por marina amerikane më vonë i hodhi poshtë pretendimet e Moskës si “propagandë” dhe e akuzoi ekuipazhin rus se ishin ata të cilët kishin bërë “një manovër të pakujdesshme”.
Marinarët amerikanë u detyruan të “ktheheshin plotësisht dhe të largoheshin për të shmangur një përplasje”, thanë zyrtarë nga Flota Amerikane.
Ndërkohë Moska nga ana tjetër pretendon se admirali i luftanijes ruse, Vinogradov ishte detyruar të merrte masa urgjente për të shmangur një përplasje mes tyre.
Marina amerikane u përgjigj duke thënë se admirali Vinogradov erdhi 50-100 metra afër anijes USS Chancellorsville, duke e detyruar atë të “kthehej mbrapa dhe të rrinte larg për të shmangur një përplasje”.
Incidenti ndodhi në orët e hershme të mëngjesit të së premtes, në pjesën lindore të Detit të Kinës në një kohë kur një grup i anijeve luftarake ruse ishte në një kurs paralel me një grup amerikan të sulmeve detare.
Duke folur në një forum ekonomik në Shën Petersburg, presidenti rus u ankua për atë që ai e quajti konkurrencë dhe mbrojtje të padrejtë.
“Qasja e SHBA nxiti një betejë pa rregulla ku të gjithë u vunë kundër njëri-tjetrit”, tha Vladimir Putin.
Incidenti vjen disa ditë pasi Uashingtoni dhe Moska u përplasën për shkak se një avion luftarak rus zbuloi një ‘avion spiun’ në afërsi të Sirisë./ Përshtati Tirana Today
