Presidenti i Turqisë, Recep Tayyip Erdogan zhvilloi një bisedë telefonike me presidentin e SHBA-ve, Donald Trump. Lajmi transmetohet nga Anadolu Agency.
Përmes një postimi në “Twitter”, Erdogan shkruan se me Trump biseduan kryesisht në lidhje me zonën e sigurt që planifikohet të vendoset në lindje të Eufratit.
“Në bisedën telefonike me presidentin amerikan Donald Trump, përveç marrëdhënieve bilaterale shkëmbyem mendime në lidhje me zonën e sigurt që planifikohet të vendoset në lindje të Eufratit”, shkruhet në postimin e shpërndarë në profilin e tij zyrtar.
Po ashtu, ata diskutuan edhe për përforcimin në marrëdhënien turko-amerikane për vijimin e përpjekjeve të përbashkëta, në mënyrë që rajoni të ruajë stabilitetin.
Kujtojmë se pak ditë më parë, Turqia dhe SHBA arritën një marrëveshje për të ndaluar ndërhyrjen e ofensivës turke në veri të Sirisë.
Turqia ra dakord që armëpushimi të zgjasë për 120 orë, në mënyrë që të lejojë tërheqjen e terroristëve të YPG/PKK-së nga zona e sigurt e planifikuar.
Po ashtu, Erdogan dhe nënpresidenti amerikan Mike Pence u dakordësuan që Turqia të ketë një zonë prej rreth 30 kilometrash në kufirin sirian.
