Përplasjet për tregjet ekonomike ndërmjet SHBA-së dhe Kinës kanë marrë një kthesë të papritur. Pas një lufte të gjatë me masa dhe kundërmasa, dy vendet duket se kanë gjetur gjuhën e përbashkët.
Mësohet se Shtetet e Bashkuara dhe Kina kanë nënshkruar marrëveshjen e parë që synon lehtësimin e luftës tregtare që ka tronditur tregjet dhe ka goditur ekonominë globale.
Presidenti i SHBA-së, Donald Trump e ka quajtur një moment historik. Sipas tij, pakti do të jetë “transformues” për ekonominë e SHBA-së.
Nga ana tjetër, pala kineze e ka cilësuar si një marrëveshje të “fitores”. Për ta, kjo marrëveshje do të ndihmojë në forcimin e marrëdhënieve më të mira midis dy vendeve.
Kina është zotuar të rrisë importet e SHBA-së me 200 miliardë dollarë, mbi nivelet e vitit 2017 dhe të forcojë rregullat e pronësisë intelektuale.
Në këmbim, SHBA-ja ka rënë dakord të përgjysmojë disa nga tarifat e reja që ka vendosur për produktet kineze.
Presidenti Trump pas nënshkrimit të marrëveshjes e ka quajtur këtë marrëveshje si “Faza e Parë”. Pritet që shumë shpejt presidenti SHBA-së të udhëtojë në Pekin për të filluar bisedimet për fazën tjetër të marrëveshjes.
Shtetet e Bashkuara filluan një luftë tregtare kundër Pekinit, një vit e gjysmë më parë, pasi e akuzuan për praktika të padrejta të tregtisë, të tilla si vjedhja e pronës intelektuale amerikane dhe subvencionet shtetërore të cilat i përfitojnë kompanitë kineze.
