Xherdan Shaqiri është i vendosur që të vazhdojë karrierën me skuadrën e Liverpool, tashmë e shpallur Kampione e Evropës.
Shaqiri shprehet se është i vetëdijshëm se do ta ketë të vështirë të zërë një vend në formacionin e parë dhe se është i lumtur vetëm nga fakti që është pjesë e kësaj skuadre.
“Jam në Liverpool, klubin më të mirë në Europë. Trajneri ka shumë opsione të mira dhe ai duhet të vendosë se kush do të luajë. E dija para se të transferohesha këtu se konkurrenca për një vend në formacionin e parë do të jetë shumë e vështirë. Unë e kam një kontratë këtu dhe planifikoj të qëndroj” – ka thënë Shaqiri në një intervistë për Goal dhe SPOX.
Pozicioni ‘i synuar’ nga ylli kosovar i futbollit është ai i mesfushorit të djathtë, i cili për momentin është “i blinduar” nga Mohamed Salah.
Shaqiri është shpallur kampion Europe për të dytën herë në karrierë, pasi skuadra e tij, Liverpool triumfoi ndaj Tottenham me rezultatin 2:0 në finalen e këtij edicioni të ‘Champions League’, në Madrid në stadiumin ‘Wanda Metropolitano’.
27-vjeçari e ka shijuar edhe më parë ndjenjën e trofeut të Champions League, në vitin 2013, gjatë kohës kur ylli kosovar luante me Bayern Munich, kjo e fundit mposhti Dortmund në finale.
