Analisti Fatos Lubonja shprehet se është në pritje se si do të vijojë aventura e radhës e kryeministrit Rama. Duke folur për qeverinë e re Lubonja tha se Rama ka treguar mungesë serioziteti për çështje të rëndësishme siç janë droga dhe krimi.
“Nuk ishte ndonjë çudi. Mbas asaj qeverisjes me popullin nuk është ndonjë çudi që ministrat mos kenë rëndësi. Ndjehet kjo sikur nuk ka peshë duke nisur që tek zv. kryeministrja e panjohur. Duket sikur e merr pushtetin ‘Rama 1’. Ajo që është më shqetësuese është se janë shkurtuar disa ministri dhe nuk është sqaruar arsyeja. Ndoshta është ngushtuar pak tepsia. Të gjitha këto janë bashkë, por shqetësimi kryesor është mungesa e seriozitetit, siç janë krimi, trafiqet dhe droga. Këto kërkojnë energji të madhe, kur sheh disa ministra që ikin si Tahiri dhe Beqja dhe disa të tjerë që vijnë”, u shpreh Lubonja për “News 24”.
Ndërsa shtoi se është në pritje të aventurës së nisur nga kryeministri Rama me qeverinë e re, e cila sipas Lubonjës është po e njëjta makinë që do të mbajë një regjim absurd në pushtet.
“Gjithçka sikur u përqendrua tek fakti sikur ne jemi më të mirët, dhe ai tha ma jepni mua timonin se do ju çoj unë në drejtimin e duhur. Por cili është drejtimi i duhur nuk na e tha. Pra a do transformohet. Ajo që shoh unë me shqetësim është fakti se këtu po kërkohet të vihet në funksionim e njëjta makinë që punon për të mbajtur një regjim absurd në pushtet. Kemi një zv. kryeministër që bëhet ministër. Pra këtu është një kauzë. Unë po pres si do i vejë fundi aventurierit”- tha Lubonja.
