Analisti Fatos Lubonja tha sonte se Basha imiton Berishën për të vendosur stabilitetin në Partinë Demokratike. I ftuar në emisionin “Studio e Hapur” në “News24”, Luibonja tha se problemi qëndron te fakti se PD është mësuar me një lider autoritar si Sali Berisha, i cili vendosi stabilitet, por jo demokraci në parti.
Lubonja ishte sonte bashkë me analistë të tjerë përballë ish-deputetit demokrat, Astrit Patozi ku diskutuan mbi krizën në Partinë Demokratike.
“Indirekt ju po i thoni Patozit, pse s’keni folur në kohën e Berishës dhe çfarë po ndodh tani që është Basha. Nëse do e shohim në këndvështrimin se çfarë po bën Basha, duke ju referuar edhe asaj që tha Patozi, stabilitet apo demokraci. Problemi është se duket se PD-ja është mësuar me një lider autoritar si Berisha që ka krijuar stabilitet, por jo demokraci, tani vjen Basha i cili duket sikur tenton të imitojë Berishën për të vendosur stabilitetin, por nuk ka karizmën e Berishës. Mbas vdekjes së babait vëllezërit fillojnë bëjnë sherr kush do marrë rolin e të parit. Autoritetin e vendos ai që merr më shumë veta”, tha Lubonja.
