Nënkryetari i LSI-së, Luan Rama e ka akuzuar Lulzim Bashën si “zëdhënës të Rilindjes”, që përpiqet t’ia kalojë fajin ministrit të Bujqësisë, Panaritit lidhur me subvencionet në bujqësi.
Në një konferencë për shtyp, Rama tha se kjo ministri ka pasur një buxhet krejt të vogël, vetëm 13 mln euro, ndryshe nga vendet e rajonit, si p.sh. Kosova me një buxhet prej 64 mln euro.
Më tej nënkryetari i LSI-së iu drejtua Ramës dhe Bashës, të cilëve u tha se LSI nuk u trembet, si dhe iu përgjigj deklaratave të kryeministrit lidhur me metastazat e kancerit:
“Është përgjegjësi e qeverisë shqiptare fakti që subvencioni i bujqësisë është vetëm 13 mln euro, ndërkohë që në Kosovë është 64 mln euro.
Për këtë fakt le të përpiqet Basha ta vërë gishtin te ministri i Bujqësisë. Më lejoni të bëj të qartë që kryetari i Rilindjes Edi dhe zëdhënësi i tij Luli nuk e trembin aspak Lëvizjen Socialiste për Integrim dhe as votuesit e shumtë që do ia japin përgjigje më 25 qershor, ku do të ndahet qeverisja e kanabisit dhe qeverisja e LSI-së. LSI në 4 vitet e ardhshme do të heqë të gjitha taksat e bujqësisë, dhe do të 5-fishojë subvencionin për bujqësinë e do të hapë 10 mijë vende pune në prodhimin bujqësor.
Të tjerët le të vazhdojnë të merren me fjalë. Meqë kryetarin e Rilindjes e ka kapur paniku i metastazave të kancerit luftohen duke goditur në kokën që ushqen dhe lejon përhapjen dhe qytetarët e dinë shumë mirë kush është metastaza.”/ Tirana Today
