Funksionarë të LSI-së kanë zhvilluar sot një takim me përfaqësues të trupit diplomatik të BE-së, SHBA-ve dhe OSBE-së në Tiranë, me qëllim informimin mbi situatën e tensionuar politike në vend, në kuadër të fushtës elektorale.
Gjatë një konferencë për shtyp nga selia e kësaj partie, nënkryetari Luan Rama, tha se u ka përcjellë ambasadorëve shqetësimin për vendimet arbitrare të Task Forcës, që sipas tij kanë ndëshkuar padrejtësisht LSI-në dhe përfaqësuesit e saj në segmente të caktuara të administratës publike, ku përmendi raste konkrete të shkarkimeve e pezullimeve nga detyra të drejtuesve të një sërë institucioneve.
Luan Rama tha gjithashtu se ka informuar diplomatët e huaj edhe për shkeljen e hapur të kodit zgjedhor nga ana e KQZ-së, ku vuri në dukje se nuk ishte nevoja e hedhjes së shortit mes PDIU-së dhe LSI-së pasi numëruesi i tretë në komision, i takonte kësaj të fundit.
Në vijim ai ftoi shqiptarët t’i bashkohen LSI-së në tubimin e nesërm në Tiranë, siç tha ai, për t’i dhënë fund marrjes peng të Shqipërisë nga oligarkët, kanabistët dhe klientët e tyre dhe për t’u hequr shpresat se me paratë e krimit dhe drogës do mund të blejnë votat e popullit shqiptar.
Shqipëria sot, është Shqipëria e errësirës së marrëveshjes së dy individëve, tha ai.
