Kreu i Grupit Parlamentar të LSI-së, Petrit Vasili ka folur në një dalje publike për mediet, pas mbledhjes së grupit.
Gjatë fjalës së tij, Vasili tha se LSI ndan të njëjtin shqetësim me atë të ambasadorit amerikan lidhur me problematikën e krimit të organizuar në vend.
Më tej, Vasili deklaroi se i është drejtuar ambasadorëve Lu e Vlahutin që të përdorin fuqinë e tyre për kthimin mbrapsht të disa vendimeve lidhur me Vettingun, në mënyrë që ai të jetë i pavarur dhe të mos kapet nga mazhoranca.
FJALA E VASILIT:
Grupi parlamentar i LSI shqyrtoi qëndrimet e sotme të ambasadorit amerikan Lu lidhur me adresimin e problematikes të rëndë që po përjeton vendi dhe me efikasitetin tepër të ulët ndaj këtij krimi dhe ndamë të njëjtin shqetësim me atë të ambasadorit amerikan lidhur me këtë çështje që po komprometon imazhin, stabilitetin e rendit dhe sigurinë e jetës së qytetarit.
Kryetarja e LSI, Kryemadhi iu drejtua Lu-së dhe Vlahutin lidhur me çështjen e Vettingut, pasi drejtësia e kapur nuk do mund të kryente kurrë atë.
Debatuam edhe në sallë pikërisht për këtë arsye, u jam drejtuar Lu dhe Vlahutin që të ushtrojnë fuqinë e tyre për të imponuar mazhorancën dhe për t’i kthyer mbrapsht këto vendime për ta çliruar Vettingun nga kapja.
Gjithçka që është investuar për Vettingun ka qenë për një Vetting të pavarur. Është akoma në kohë të rishikohen e të anulohen këto vendime skandaloze e të turpshme.
Në rast se kjo nuk ndodh, Shqipëria mbetet në dorë të bandave. Sot jemi të gjithë më të shqetësuar se kurrë, ky shqetësim ka kaluar dukshëm kufijtë e Shqipërisë.
