Zgjedhjet parlamentare të 25 prillit u fituan nga Partia Socialiste, e cila siguroi 74 mandate dhe do të qeverisë sërish e vetme në 4 vitet e ardhshme.
Por, rezultati nuk është pranuar nga opozita, pasi sipas saj zgjedhjet e manipuluan nga mazhoranca, dhe pati blerje masive të votës.
Lëvizja Socialiste për Integrim, ishte partia që humbi më shumë nga këto zgjedhje, pasi nga 19 mandate të fituara në vitin 2017, u tkurr në 4 mandate.
Për këtë arsye, kryetarja e kësaj force politike, Monika Kryemadhi deklaroi se grupi i kuristëve në parti dorëzoi sot ankimimet e para për procesin e 25 Prillit.
Kryemadhi u shpreh se do t’i shkohet deri në fund zbardhjes së të vërtetës, pasi sipas saj, e vërteta e zgjedhjeve të 25 prillit është brenda tek kutitë.
”Grupi i juristëve i angazhuar pranë LSI për çështjet zgjedhore, dorëzoi sot ankimimet e para për procesin e 25 Prillit. Kështu do të vazhdojnë me radhë, në respekt të afatit ankimor, për të gjitha problematikat e evidentuara. Me vigjilencë dhe qetësi, t’i shkojmë deri në fund zbardhjes së të vërtetës. E vërteta e 25 Prillit është brenda tek kutitë.”, shkruan Kryemadhi në rrjetin social, Facebook.
