Deputeti i Partisë Socialiste, Petro Koçi, është prononcuar për mediat pas dëshmisë për Prokurorinë e Posaçme. Petro Koçi tha se kriminelët fusin duart te tenderat në Fier, madje sipas tij, edhe kërcënojnë autoritetet lokale atje. Ai paralajmëroi se nuk do të heqë dorë nga denoncimet mbi influencën e botës së krimit për tenderat në Bashkinë e Fierit. Në deklarimin e tij, ai ka qenë tepër i rezervuar duke mos dhënë emra konkret se cilët janë zyrtarët lokalë të kërcënuar apo njerëz të botës së krimit që kanë përfituar fonde nga prokurimet publike, por përmendi LSI-në.
“Është një botë goxha e konsoliduar që kanë pastruar paratë. Unë jam një nga politikanët që kam guxuar dhe kam bërë edhe kallëzime penale disa herë. Gjatë fushatës, kemi denoncuar një gjyqtar. Unë jam politikan dhe e ndjej që bota e krimit në Fier është goxha influente, ky sensibilizim edhe për SPAK-un është shumë i nevojshëm”.
Por a ndihmohet krimi në Fier nga politika? “Ju e dini që ka pasur lidhje të konsoliduara me politikën. Të tillë në marrëdhënie me LSI-në edhe ndikuan në rezultate zgjedhore, të fundit ndikuan. Sigurisht që unë për rastet që kam denoncuar edhe konkretisht i ripërmenda për të theksuar që kam një vullnet të palëkundur për të bashkëpunuar me drejtësinë”.
Por përse nuk rrëfen emrat e kriminelëve që kanë kërcënuar zyrtarët në Bashkinë e Fierit?
“Unë jam politikan. Nëse do të kisha dokumente, do i vendosja në dispozicion të Prokurorisë. Qëndrimet e mira nuk janë për të larë hesape me asnjë politikan, duhet të lajmë hesapet me botën e krimit. Ata ndikojnë edhe në financat publike, përmes lidhjeve të drejtpërdrejta apo duke kërcënuar. Unë jam shumë i bindur”.
Por cili zyrtar është kërcënuar? “Jam i bindur në gjithë perceptimin tim politik, por edhe nga fakti që shumica e zyrtarëve në Fier nuk e kanë mirëpritur deklaratën time, që do të thotë se është e vërtetë dhe dhemb për disa. Nuk dhemb për PS-në, pasi është distancuar”, tha Koçi.
