Pas takimit 70-minutash me kreun e PD-,së Lulzim Basha, ambasadori amerikan Donald Lu ka shkuar urgjent në selinë e LSI-së, ku po zhvillon një takim me kryetaren e kësaj partie, Monika Kryemadhi. Edhe takimi me këtë të fundit mësohet se është kërkuar nga vetë ambasadori Lu.
Takimi vjen dy ditë pas protestës, e cila u shoqërua me dhunë brenda dhe jashtë Kuvendit. Por, ndryshe nga Basha, LSI nuk është treguar e rezervuar për ambasadorët dhe qëndrimin e tyre për sa i përket kaosit të ditës së protestës.
Para pak ditësh, Luan Rama akuzoi ambasadorët e EURALIUS-it dhe OPDAT-it kur tha: “Dyfytyrësi korruptive! Heshtje që e kompromenton rëndë vetē rolin dhe misionin e tyre e i bën bashkëfajtorē me tepsinë e drogës ku ështē miksuar qasja antiligjore e korruptive e vetë maxhorancës që zgjodhi KED-në!”.
Ndërkohë, dje ka qenë deputetja Kejdi Mehmetaj, ajo e cila u është drejtuar me një letër publike ambasadorëve Lu dhe Vlahutin, të cilët i quante po aq përgjegjës për dhunën që është ushtruar ndaj deputetëve, sepse, sipas Mehmetajt, ata nuk folën në asnjë rast dhe nuk mbrojtën të drejtat e tyre.
Pas kaosit që ndodhi në protestë, reagoi edhe Ambasada e SHBA-ve, e cila ka dënuar dëmtimin e pronës publike, duke shtuar se “hedhja e granatave tymuese në Parlament dhe dhuna nuk janë të pranueshme”, ndërsa shtonte se Prokurori i Përgjithshëm që refuzonte të ndiqte penalisht politikanë është i ikur.
Në reagimin e ambasadës, po ashtu paralajmërohej për ndjekje penale ndaj zyrtarëve të korruptuar të nivelit të lartë.
Reagimi i ambasadës:
Ambasada e Shteteve të Bashkuara dënon me forcë dhunën që ndodhi në protestën e sotme në Tiranë. Ne mbështesim të drejtën e qytetarëve për të protestuar paqësisht, por dëmtimi i pronës publike, hedhja e granatave tymuese në Parlament dhe dhuna nuk janë të pranueshme. Ne i bëjmë thirrje të gjitha partive që të tregojnë vetëpërmbajtje dhe të nxisin qetësi.
Populli shqiptar nuk duhet të habitet që politikanët e tyre po luftojnë njëri-tjetrin. Kjo do të thotë se reforma në drejtësi më në fund po zbatohet. Komisionet e Vettingut do të kenë së shpejti rezultatet e tyre të para. Prokurori i Përgjithshëm që refuzonte të ndiqte penalisht politikanë është i ikur. Së shpejti do të shohim krijimin e SPAK-ut dhe BKH-së, të cilat do hetojnë dhe ndjekin penalisht zyrtarë të korruptuar të nivelit të lartë. Qytetarët shqiptarë presin me padurim për drejtësi. Dhe politikanët kanë frikë.
