Lobimi i Partisë Demokratike në Shtetet e Bashkuara të Amerikës vijon të jetë i rrethuar me mistere të shumta. Në një kohë kur FBI-ja amerikane ka nisur hetimet në lidhje me lobistin Nick Muzin, nga ana tjetër edhe organet e Prokurorisë në Shqipëri kanë filluar gjurmimin e kontratave të PD-së.
Investigimi i bërë publik nga revista amerikane “Mother Jones” mes tjerash theksonte se një pjesë të parave të selisë blu, janë paguar nga biznesmenë rusë. Këto akuza i ka hedhur poshtë vetë Lulzim Basha duke i quajtur si sulm të fabrikuar politikisht.
Pas Arben Ristanit një tjetër zyrtar i Partisë Demokratike, pritet të mbërrijë në dyert e prokurorisë së Tiranës, për të dhënë shpjegime për mënyrën e financimit të kontratave lobuese në Shtetet e Bashkuara të Amerikës. Bëhet fjalë për shefin e financës, Ilir Dervishi, i thirrur nga organi i akuzës në kryeqytet, në cilësinë e personit që ka dijeni.
Hetimet për çështjen në fjalë nisën kryesisht nga prokuroria pesë muaj më parë, pas dyshimeve se Partia Demokratike kishte deklaruar në KQZ të dhëna të rreme për financimin e kontratave.
Nga verifikimet, selia blu rezulton të ketë deklaruar në KQZ, se ka paguar 125 mijë dollarë për lobim, në një kohë që kompania e Nik Muzin deklaron tri pagesa në shumën e 675 mijë dollarësh për punën e kryer për llogari të Partisë Demokratike. Konkretisht, pagesa e parë është bërë me datë 24 mars 2017 nga firma ‘Biniatta Trade LP”, me një vlerë prej 150 mijë dollarësh.
Dy pagesat e tjera janë kryer nga Partia Demokratike. E para me datë 27 mars me vlerë 25 mijë dollarë dhe pagesa e dytë prej 500 mijë dollarësh është kryer me 9 qershor.
Për hedhur dritë mbi skemën e financimit, prokuroria krahas dëshmisë së shefit të financës Dervishi, përmes letërporosisë dërguar në Shtetet e Bashkuara kërkon edhe dëshminë e lobistit Nik Muzin.
“Grupi i hetimit kërkon që Muzin ti përgjigjet disa pyetjeve, mes të cilave se nga kush u kontaktua jo vetëm nga selia blu për të lobuar për llogari të saj, por edhe nga kompania BINIATA dhe përse e lidh këtë tyë fundit me partinë Demokratike.”-shkruan BW.
Po ndërsa prokuroria pret zbatimin e kësaj letërporosie dhe po kërkon dokumente shtesë nga thesari e tatimet, një shkrim i fundit i revistës amerikane “Mother Johnes” është bërë shkak për debate të forta në vend. Teksa paraqet skemën e financimit, revista nxjerr dritë edhe emrat e dy shtetasve rusë që duket se kanë rol në kontratat lobuese.
