Ministria e Brendshme po zhvillon një mbledhje bashkë me Policinë e Shtetit, ku do të bëhen disa propozime për ndryshime në Kodin Rrugor, në kuadër të masave për rritjen e sigurisë në vend.
Gjatë fjalës së tij në këtë mbledhje, Lleshaj ka sugjeruar që në Shqipëri të implementohet testi i “idiotit” i cili aplikohet edhe në Gjermani. Gjithashtu propozohet që çdo drejtues të ketë kartelë të tij biografike.
“Kemi shumë të vrarë në rrugët e vendit dhe ky numër duhet të ulet. Duhet të ulet dhe numri i aksidenteve dhe të plagosurit dhe dëmet material. Vetëm për një javë janë hequr 371 leje drejtimi dhe ende persiston një lloj sjelljeje në rrugë e papranueshme. Bie në sy një sjellje agresive në rrugë. Kemi ende përdorues rruge që nuk e meritojnë lejen e drejtimit që kanë. Ka ardhur koha të mendojmë për teste psikologjike për drejtuesit e mjetit që verifikojnë stabilitetin psikologjik të tyre. Në Gjermani quhet testi i “idiotit””, tha Lleshaj.
“Testi i idiotit” është makthi më i keq për drejtuesit gjermanë pasi nuk është vetëm i vështirë, por gjithashtu kushton shumë kohë dhe para. Edhe pse ekzaminimi është vullnetar, në disa raste është i pashmangshëm, sepse nuk do të mund ta merrni dot patentën në ndonjë mënyrë tjetër.
Ky test është një kontroll mjekësor-psikologjik i cili besohet se të jetë i nevojshëm nga gjermanët. Ndëshkimin për të bërë këtë test e marrin zakonisht ata shoferë që janë kapur duke i dhënë makinës në gjendje të dehur, ose nën efektin e drogës.
Sidoqoftë, alkooli dhe droga nuk janë arsyet e vetme që shoferët do të duhej të bënin provën. Nëse parkoni rregullisht makinën tuaj në të njëjtin vend, edhe pse parkimi atje është i ndaluar, policia gjithashtu mund t’ju detyrojë të bëni testin. Në fund të fundit, nëse vazhdoni të bëni të njëjtin gabim, ju duhet qartë një ekzaminim psikologjik, besojnë gjermanët.
