Presidenca ka reaguar pas lirimit me kusht të Genci Tafilit, një prej vrasësve të komisarit të policisë, Arben Zylyftari.
Meta ka urdhëruar menjëherë Inspektoriatin e Këshillit të Lartë të Drejtësisë, që të fillojë urgjentisht verifikimin e rastit në fjalë dhe veprimtarinë proceduriale të kësaj gjykate.
Po ashtu, në njoftimin publikuar nga Presidenca thuhet se Meta mbështet të gjitha institucionet ligjzbatuese dhe Prokurorinë në veprimtarinë e tyre, në luftën kundër krimit dhe sundimit të ligjit.
Genci Tafili u lirua pas 17 vitesh burgim, teksa akuzohej për vrasjen e komisarit të policisë Arben Zylyftari, në bashkëpunim me vëllanë e tij, Admir Tafilin.
Prokuroria e Krujës ka ankimuar në Gjykatën e Apelit lirimin e Tafilit, me argumentin se vepra për të cilën ai është dënuar, nuk përfiton lirim me kusht.
NJOFTIMI I PRESIDENCËS:
Presidenti i Republikës, me cilësinë e Kryetarit të Këshillit të Lartë të Drejtësisë, pasi u njoh me lajmin dhe reagimin publik të institucionit të Prokurorisë, për veprimtarinë e Gjykatës së Rrethit Gjyqësor Krujë, në lidhje me lirimin e shtetasit Genc Tafili, ka urdhëruar menjëherë Inspektoriatin e Këshillit të Lartë të Drejtësisë, që në përputhje me kërkesat e ligjit, të fillojë urgjentisht verifikimin e rastit në fjalë dhe veprimtarinë proceduriale të kësaj gjykate.
Presidenti i Republikës garanton se pretendimet e institucionit të Prokurorisë do të verifikohen nga Inspektoriati dhe Këshilli i Lartë i Drejtësisë, në përputhje me kushtet dhe kriteret e ligjit.
Presidenti i Republikës mbështet të gjitha institucionet ligjzbatuese dhe Prokurorinë në veprimtarinë e tyre, në luftën kundër krimit dhe sundimit të ligjit.
