Banda e Met Kananit, e cila u godit ditën e sotme përmes një operacioni të gjerë antidrogë, ka zhvilluar një aktivitet kriminal me përmasa të jashtëzakonshme.
Nga detajet e bëra publike nga Policia e Shtetit, bie në sy edhe linja e trafikimit të heroinës, ku Shqipëria ishte vendi i transitit të kësaj lënde narkotike dhe më pas shitej në vendet e Bashkimit Evropian.
Sipas Policisë së Shtetit, “dyshimet ishin se ky grup kriminal vepronte në linjat e trafikimit të heroinës, Turqi – Greqi – vendet e BE-së, si dhe Turqi – Maqedoni – Shqipëri – vendet e BE-së. Një tjetër aktivitet kriminal, i zbuluar nga hetimet ishte trafikimi i kokainës nga vendet e Amerikës Latine përmes vendeve të Ballkanit në Shqipëri dhe vendet e BE-së.”
Nga operacioni antidrogë janë vënë në pranga një sërë shtetas shqiptarë, të cilët variojnë nga jugu në veri, ndërsa midis tyre është edhe një femër.
Në kuadër të veprimeve hetimore, me autorizim të Prokurorisë për Krime të Rënda, është shkëmbyer informacion me autoritetet policore të Greqisë, Turqisë, Maqedonisë, Italisë me ndërmjetësimin e DEA-s, SELEC dhe oficerëve të kontaktit të vendeve respektive ku janë realizuar me sukses një sërë operacionesh policore dhe konkretisht:
Nga kryerja e aktivitetit kriminal të këtij grupi dhe si rezultat i shkëmbimit të informacionit në kohë reale me autoritetet e Hetimit Penal në Rajonin e Atikës në Greqi, më datë 4 prill 2017, është bërë arrestimi i shtetasve shqiptarë;
-Ermal Berxhi, 32 vjeç
-Astrit Gërbi, 56 vjeç
-Daniel Luka, 31 vjeç
-Luljeta Berxhi, 51 vjeçe
Këtyre shtetasve u janë sekuestruar:
– 32.4 kg lëndë narkotike e llojit Cannabis Sativa,
– 27.8 gram lëndë narkotike e llojit ‚‘‘Kokainë‘‘
– 5.845 euro.
– Në datë 21 korrik 2017, në Fier, janë sekuestruar 70 kg lëndë narkotike janë arrestuar 5 shtetas.
– Në datë 18 dhjetor 2017 në Vlorë, është bërë arrestimi në flagrancë i shtetasit: Renato Agalliu, ku iu sekuestruan 77 kg lëndë narkotike e llojit Cannabis Sativa.
